بەدواداچوون بۆ کێشەى مووچەو هاوکارى کەمئەندامان و خاوەن پێداویستى تایبەت
2021-07-12
46 جار خوێندراوەتەوە
 
لە ساڵى ٢٠٢٠، بڕى (٣٩٦ ملیار دینار) لە فەصڵ و ماددەى تایبەت بە تۆڕى پاراستنى کۆمەڵایەتى (کەمئەندام و هەژارەکان) لە بەغداوە نێردراوە بۆ کوردستان، کەچى حکومەت تەنها پێنج جار هاوکاریى کەمئەندامانى دابەش کرد، لە برى دابەشکردنى (١٤٤) ملیار دینار، تەنها (٦٠) ملیاری دابەش کرد، واتە بەو بڕەى لە بەغداوە هات دەتوانرا (١٢) مووچەى ساڵى (٢٠٢٠)ى کەمئەندامانى پێ بدریت و (٢٥٢) ملیاریشى لی بدرێت بە هەژارەکان، بۆ ئەو مەبەستەش بە نووسراوى ژمارە (٣٩) لە (٢٤ى ١ى ٢٠٢١) یاداشتێکم پێشکەش بە بەرێزانى دەستەى سەرۆکایەتى پەرلەمان کردو ئاراستەى سەرۆکایەتى ئەنجومەنى وەزیران کرا، پاش شەش مانگ حکومەت چارەنووسى ئەو پارەیەى ئاشکرا نەکرد، هەربۆیە جارێکیتر بە ژمارە (٦٥) لە (٩ى ٦ى ٢٠٢٠١) یاداشتێکى ترم ئاراستەى سەرۆکایەتى پەرلەمان کردووەو ئەوانیش لاى خۆیانەوە ئاراستەى ئەنجومەنى وەزیرانیان کردووەو ئەنجومەنى وەزیرانیش ئاراستەى وەزارەتى دارایى کردووە، من کۆڵ نادەم، هەر بەدوایەوە دەبم، چونکە ئەوە قوتى هەژارەکانە.
 
بە پێى یاساى ژمارە (٢٢)ى ساڵى (٢٠١١)ى ماف و ئیمتیازى کەمئەندامان، هەروەها بە پێى هەموارى هەمان یاسا، کە لە دانیشتى ژمارە (١٨)ى ڕۆژى (٨ى ٧ى ٢٠٢١)ى پەرلەمان دەنگى پێدرا، مووچەو هاوکارى خاوەن پێداویستى تایبەت و کەمئەندام (کە هیچ مووچەیەکى نەبێت) لە (١٥٠ هەزار دینار) دەست پێدەکات بۆ (٢٥٠ هەزار دینار) بە پێى ریژەى کەمئەندامى، بەڵام حکومەت پابەندى ئەم یاسایە نیەو دە ساڵە مووچەى خاوەن پێداویستى وەک خۆى نادات و ڕێژەکەى هەرچەند بێت هەر (١٥٠ هەزار دینار) دەدات بەوانەى هیچ مووچەیەکیان نییە، لەسەر ئەم بابەتەش بەردەوام دەبین لە بەدواداچوون تا حکومەت پابەندى ئەو مافەى کەمئەندامان دەبێت و هاوکارییە داراییەکان وەک یاسا دەدات.
 
لە ساڵى (٢٠١٢)ەوە تۆمارکردنى خاوەن پێداویستى تایبەت و کەمئەندامان ڕاگیراوەو هیچ مووچەیەک بۆ هیچ کەمئەندامێک تەرخان نەکراوە، ئەمەش هیچ پاساوێکى یاسایى نیەو ستەمە، لەو بەروارەوە تا ئێستا زیاتر لە (٢٠ هەزار )هاووڵاتى چاوەڕێى تۆمارکردنى ناویان و تەرخانکردنى ئەو بڕە هاوکارییەن، بۆ ئەم بابەتەش بە ژمارە (١٠) لە بەروارى (٢٠ى ١٠ى ٢٠٢٠) یاداشتێکم پێشکەش بە سەرۆکایەتى پەرلەمان کردووە، ئەوانیش لاى خۆیانەوە ئاراستەى سەرۆکایەتى ئەنجومەنى وەزیرانیان کردووە، بەڵام تا ئیستا حکومەت پابەندى ئەم ئەرکە داراییە نەبووە، لەسەر ئەمەش بەردەوام دەبین.
 
بە پێى یاساى بودجەى عێراق کە لە بەغداوە بڕى ٢٠٠ ملیارى گەیشتووەتە هەرێم، بە پێى یاسا بەرکارەکان، بە پێى بنەما دەستوورییەکان، بە پێى بەڵێنەکانى کابینەى نۆیەم کە بەڵێنى داوە ژیانى هاووڵاتیانى خاوەن پێداویستى تایبەت باشتر بکەن، هاووڵاتیانى خاوەن پێداویستى تایبەت و هەژارانى ئەم وڵاتە مافیان لە داهاتى ئەم وڵاتەدا هەیە، خۆ خێریان پێ ناکەن، حکومەت پێویستە بەر لە هەر کەس حکومەتى چین و توێژەکانى خوارەوەى کۆمەڵگە بێت.
 
عومەر گوڵپى
ئەندامى پەرلەمانى کوردستان
١٢ى ٧ى ٢٠٢١

 


لە تۆڕە کۆمەڵایەتیەکان شەیری بکە

پەیوەندیدار
    میوان 12
دروستکراوە لەلایەن KodTech.Net