گفتوگۆى پرسى دەستورو ئایندەى هەرێمى کوردستان
2021-06-04
379 جار خوێندراوەتەوە

لە (شار پرێس) وەرگیراوە، ٣ى ٦ى ٢٠٢١:

ئەندامێكی فراكسیۆنی كۆمەڵی دادگەری رایدەگەیەنێت؛ سورن لەسەرئەوەی گەلی موسڵمان دەبێت دەستورێكی هەبێت و تەعبیر لە موسڵمانێتیەكەی بكات، پێیوایە، پرسی دەستور لە ئێستادا وەك بانگەشەی هەڵبژاردن بەكاردەهێنرێت، لەبارەی داهاتیشەوە دەڵێت: پارەی پێویست لەبەردەستە بۆ موچە بەبێ لێبڕین و بەگڕخستنەوەی پرۆژەكان.

لە چاوپێكەوتنێكیدا لەگەڵ شارپرێس، عومەر گوڵپی ئەندامی پەرلەمانی كوردستان لە فراكسیۆنی كۆمەڵی دادگەری، لەسەر پرسی دەستور رایگەیاند: "كاكردن بۆ نوسینەوەی دەستور دوای 30 ساڵ لە فەرامۆشكردنی وەك بانگەشەی هەڵبژاردن بەكاردەهێنرێت و هەنگاوی كرداری نەنراوە، ئەگەر دەسەڵات نێتیان لەگەڵ پرسی دەستور باشە دەبێت بەرەو چاكسازی ڕاستەقینە هەنگاو بنێن، بەتایبەتی ئەوەندە داهات هەیە كێشەی موچەی پێ چارەسەر بكەن".

سەبارەت بەوەی ئایا دوای نوسینەوەی دەستور حوكمێكی تەندروست فەراهەم دەبێت وتی: "دەبێت ئیرادەیەكی سیاسی جدی لەدایك ببێت، لەبەرئەوەی ئێستا یاسای باش هەیە بەڵام لەلایەن دوو حزبی دەسەڵاتەوە پێشێل دەكرێت، زۆرینەیەكی پەرلەمانی هەیە بۆ زوڵمكردن لە خەڵك بەكاردەهێنرێت، زۆرینەیەك نین بە ئاراستەی بەرژەوەندی نیشتمانیدا كاربكەن".

دەشڵێت: "ئەو عەقڵێتەی ئێستا حوكمی هەرێمی كوردستان بەڕێوەدەبات زیاتر بۆ بەڕێوەبردنی خێڵێك و بنەماڵەیەك باشە، بۆئەوە ناشێت وڵاتێك بدەیتە دەستی و دەستور بنوسێتەوە، ئەم عەقڵێتە نایەوێت سەروەت و سامانی ئەم وڵاتە بۆ دابینكردنی مافەسەرەتاییەكانی هاوڵاتیان خەرجبكرێت".

ئەو ئەندامی فراكسیۆنی كۆمەڵی دادگەری زیاتر لەبارەی دەستورەوە قسەی كرد و پێیوایە، شتێكی سروشتییە دەستور تەعبیر لە گەڵیكی موسڵمان بكات و گەلی موسڵمان ئەم دەستورە بەهی خۆی بزانێت، لەگەڵ ئەوەی پارێزگاری لە ئاینەكانی تر و ئازادییەكانیان و بیروباوەڕیان بكات و مافەكانیان بۆ دەستەبەربكات، وتیشی: "سورین لەسەرئەوەی گەلی موسڵمان دەبێت دەستورێكی هەبێت تەعبیر لە موسڵمانێتیەكەی بكات".

لە چاوپێكەوتنەكەدا، لەبارەی لێكردنەوەی پاشگری ئیسلامییەوە لە حزبەكەی ئاماژەی بەوەكرد، كاتێك پاشگری ئیسلامییان لێكردووەتەوە جیهان بینییان نەگۆڕاوە بۆ ژیان و كۆمەڵگە و پەیوەندی نێوان مرۆڤەكان، بەڵكو تێگەیشتنیان بۆ واقعی سیاسی و كاری سیاسی گۆڕاوە، بۆیە لە ڕووی مەبادیئەوە لەسەرپێی خۆیان وەستاون.

لە كۆتایی چاوپێكەوتنەكەدا باسی لە پرسی چاكسازی كرد و وتی:"هەردوو حزبی دەسەڵات لە بری چاكسازی لە سەرچاوەكانی داهاتدا بیر لە خەرجییەكان دەكەنەوە، هەرچەندە هەردووكیان چاكسازی تێدا دەكرێت، بەڵام بەرهەمی گەورە لە چاكسازی لە سەرچاوەكانی داهاتدایە، لە سێ ملیار دۆلار داهاتی گومرگ تەنها یەك ملیار دۆلار دەگەڕێتەوە بۆ خەزێنەی گشتی، دوو ملیاری بە قاچاخچێتی و گەندەڵی و بە كۆمپانیاكاری و خراپی سیستم بەهەدەر دەدرێت، بۆیە چاومان لەوەیە چاكسازی گەورە لە داهاتدا بكرێت".

وتیشی: "ساڵێك بەسەر كاتی جێبەجێكردنی یاسای چاكسازیدا تێپەڕیوە تائێستا حكومەت لە قۆناغی دەركردنی بڕیار و ڕێنمایی دەرنەچووە، لە هەندێك وباردا %4 جێبەجێكراوە و لە هەندێكی تردا %12، لە بواری چاكسازی لە هێزەكانی 70 و 80 هیچ لێ جێبەجێ نەكراوە".

جەختیكردەوە لەوەی، كە ئێستا لە هەرێمی كوردستاندا پارەی پێویست لەبەردەستە بۆ موچە بەبێ لێبڕین، بۆ خزمەتگوزارییەكان و وەزارەتەكان و بەگڕخستنی پرۆژەكان، داهاتی مانگانە ترلیۆنێك و 95 ملیار دینارە، بۆیە جێبەجێكردنی یاسای بودجەی عێراق نابێتە هۆی زیادكردنی داهات لە حاڵەتێكدا نەبێت لە هەرێمی كوردستان گۆڕانكاری ڕیشەی رووبدات.


لە تۆڕە کۆمەڵایەتیەکان شەیری بکە

پەیوەندیدار

دروستکراوە لەلایەن کۆمپانیای (کۆدتێك)ەوە
ژمارەی سەردان 285,267     ژمارەی میوان 93